မြန်မာ့လက်မှုအနုပညာတခု

သည် post ကို ကိုမိုးသီးက ရေးခိုင်းထားတာ တနှစ်ကျော်လောက် ကြာပါပြီ ... ။ မရေးချင် ရေးချင်နဲ့မို့ မရေးဖြစ်ခဲ့တာပါ။ဖေဖော်ဝါရီ လ တုန်းက ကိုရင်မောင်နဲ့ ဖုန်းပြောဖြစ်ရင်း သူက လက္ခဏ မကိုဋ်ခေါင်း တခေါင်း လိုချင်တယ်ပြောလို့ သူ့အတွက် မကိုဋ်ခေါင်း လုပ်ရင်းက ဒါကို ပို့စ် တခုရေးရင် ကောင်းမယ်ဆိုတာ သတိရလိုက်တာပါ။ ရက် ၅၀ လောက် အချိန်ယူပြင်ဆင်လိုက်ရလို့ Post တွေထဲမှ သည် post လောက် အချိန်ယူပြင်ဆင်ရတာ ကျွန်တော့်မှာ မရှိသေးဘူး ပြောလို့ရမှာပေါ့။

မြန်မာရိုးရာလက်မှုအနုပညာတွေထဲမှာ ပန်းဆယ်မျိုးစာရင်းမဝင်တဲ့ လက်မှုအနုပညာတခု လို့ ပြောရမှာလားမသိဘူး။ သုံးတာကလည်း ရာမာယဏ ဇတ်တော်ကြီးရဲ့ ဇတ်ဝင်ခန်းတွေမှာ၊ ဇတ်တွေထဲမှာ ပဲ သုံးကြတာမို့ပါ။ ဒါပေမယ့် ပန်းဆယ်မျိုးလုံး မပြည့်တပြည့် ကို စုပေါင်းပြီး အသုံးပြုထား ရတာပါ။

ဒါပေမယ့် သည်ပညာရပ်ကို ကလေးကစားစရာတွေအနေနဲ့ အများစုကတော့ မြင်ဘူးကြပါတယ်။

ရာမာယဏ ဇတ်တော်ကြီး ကပြတဲ့အခါမှာ ဆောင်းကြတဲ့ မကိုဋ်ခေါင်းတွေကို ရာမာယဏ အသင်းဝင်တွေ ကိုယ်တိုင် လုပ်ကြရပါတယ်။ ငယ်ငယ်က ရာမာယဏ ခရေစီဖြစ်ခဲ့တဲ့(အခုလည်း မကျွတ်သေးပါဘူး) ကျွန်တော်လည်း အိုးဘိုရာမအသင်းတိုက်မှာ ဆရာတွေရဲ့ နည်းပြကူညီမှုတွေနဲ့ သည်အတတ်ပညာကို သင်ခဲ့ရပါတယ်။ အဲသည်တုန်းက ကျွန်တော့်ကို အနီးကပ်သင်ပေးခဲ့တဲ့ အိုးဘိုရာမ က ကိုစိန်ဝင်း နဲ့ အသင်းသားဆရာအားလုံးကို ဂါရဝပြုပြီး သည်ပို့စ်ကို ရေးပါတယ်။

ရာမာယဏအသင်းတခုမှာ မကိုဋ်ခေါင်းတခု လုပ်တော့မယ်ဆိုရင် သက်ဆိုင်ရာ ကန်တော့ပွဲ ကို အရင်ထိုးကြရတာ အစဉ်အလာပါ။

မကိုဋ်ခေါင်းတခုလုပ်ဖို့အတွက် မို (Mole) တခု လိုအပ်ပါတယ်။
မို (Mole) ကို ပြုလုပ်ရာမှာ အနည်းဆုံး ရွေးချယ်မှု ၂ မျိုး ရှိပါမယ်။
ပထမတစ်မျိုးက ရွံ့၊ ပလာစတာ လိုမျိုးတွေနဲ့ လုပ်ထားတဲ့ မို အပေါ်မှာ စက္ကူအလွှာလွှာကပ်ပြီး ရယူတဲ့နည်းပါ။
ဒုတိယတစ်နည်းကတော့ - ကြိမ် သို့မဟုတ် ဝါးနှီးမျှင်တွေနဲ့ အောက်ခံပုံကြမ်းကို ရက်လုပ်တာပါ။ အခုခေတ်မှာ ကြိမ်နဲ့၊ ဝါးနဲ့ ရက်လုပ်ထားတဲ့  ဆင်းတုတော် (နှီးဘုရား) ကြီးတွေအနေနဲ့ အလွယ်တွေ့နိုင်ပါတယ်။
ကျွန်တော်ကတော့ လွယ်ကူ သက်သာတဲ့ နည်းဖြစ်တဲ့ - ရွှံ့၊ ပလာစတာ စတာတွေနဲ့ ကိုယ် လုပ်ချင်တဲ့ မကိုဋ်ခေါင်းပုံကို မို တခု အရင်လုပ်ရပါတယ်။

အခု အနားမှာ ပလာစတာ မလွယ်လို့ ကျွန်တော် ရွှံ့ကို ရွေးချယ်လိုက်ပါတယ်။

ပထမဆုံး စေးထန်းမှုကောင်းတဲ့ ရွှံ့ကို လောက်စာလုံးအရွယ်လောက်တွေ လုံးပြီး အခြောက်ခံပါတယ်။ ကောင်းကောင်းခြောက်တဲ့အခါ အမှုန့်ထောင်းပြီး ဆန်ကာတိုက်ချပါတယ်။ ဒါမှ ခဲသေးသေးလေးတွေ၊ အမှိုက်တွေ ပါမလာပဲ ရွှံ့စေးကောင်းကောင်းရမှာပါ။ အဲသည်ရွှံ့မှုန့်တွေကို ရေနဲ့ နှဲ၊ ရေစိုဂွမ်းစောင်နဲ့ အုပ်ပြီး သုံးရက်လောက် နှပ်ထားလိုက်ပါတယ်။ ပြီးတော့မှ ကျစ်ပြီး အသားညီသွားအောင် ထု ထောင်း နှဲပါတယ်။ အဲသည်ရွှံ့တုံးကြီးကိုမှ လိုချင်တဲ့ ပုံရအောင် လုပ်ယူပါတယ်။ အဲသည်လို လုပ်တဲ့အခါမှာ လိုချင်တဲ့အရွယ်အစားဖြစ်အောင် ချိန်ကိုက်ယူရပါတယ်။

မကိုဋ်ခေါင်းအတွက် ပင်မခေါင်းအပြင် လိုအပ်တဲ့ အခြား အစိတ်အပိုင်းတွေကိုပါ မို တွေလုပ်ယူရပါသေးတယ်။

မို တွေ ရပြီဆိုတော့မှ မိုတွေပေါ်မှာ စက္ကူအလွှာအထပ်ထပ် ကပ်ရပါတယ်။ အခု ကျွန်တော်က စက္ကူမကပ်ခင်မှာ ကြွပ်ကြွပ်အိပ် နဲ့ အောက်ဆုံးအလွှာကို စပြီးကပ်ပါတယ်။ မို ကနေ စက္ကူ ပြန်ခွာရလွယ်အောင်လို့ပါ။ (ဆရာတွေသင်ထားတဲ့အထဲမှာတော့ မပါဘူးး)။) စက္ကူကို ပြည်တွင်းမှာ မိုင်းကိုင်စက္ကူ ဒါမှမဟုတ် ရှမ်းစက္ကူလို့ အများသိကြတဲ့ လက်လုပ်စက္ကူကို သုံးပါတယ်။ တခြား စက္ကူတွေ စမ်းကြည့်ဖူးပါတယ်။ သုံးလို့မကောင်းပါ။ ကော်ကိုလည်း ဆရာတွေသင်ထားတဲ့အတိုင်း သာကူကို အစေ့ပျောက်အောင် ကြိုပြီး သုံးပါတယ်။ တခြားကော်အမျိုးမျိုး သုံးကြည့်တာ သာကူကော်လောက် သုံးလို့မကောင်းပါ။ စက္ကူကပ်တဲ့အခါမှာ တထပ်ခြောက်မှ နောက်တထပ် ထပ်ကပ်ရပါတယ်။ တထပ်နဲ့ တထပ်ကြား လေမခိုအောင် သတိထားရပါတယ်။ မခြောက်ပဲ နှစ်လွှာ သုံးလွှာ ဆင့်ကဲ ကပ်မိရင်တော့ အတွင်းမှာ ကော်အိပ်ပြီး စက္ကူသား ပွစိစိ ဖြစ်နေပါလိမ့်မယ်။ တလွှာကပ်ပြီး တနေကုန်နေလှမ်း ဆိုတော့ တနေ့တနေ့ အချိန်လည်း အများကြီး မသုံးဖြစ်တော့ပါဘူး။ ကြားထဲမှာ နေမသာလို့ မခြောက်တဲ့နေ့တွေမှာ ထပ်မကပ်ဖြစ်ပါဘူး။ ကျွန်တော် ၁၅ လွှာ ကပ်အပြီးမှာ ၃ ရက်ဆက် နေလှမ်းလိုက်ပါတယ်။ လုံးဝ သွေ့ခြောက်သွားပြီလို့ ယူဆနိုင်မှ စက္ကူကို ထက်ခြမ်းခွဲလိုက်ပြီး စက္ကူကို ခွာထုတ်လိုက်ပါတယ်။ ထု ၀.၁ လက်မ လောက် ကပ်ထူသား နဲ့ ပုံကြမ်းရပါပြီ။
အဲသည်ထက်ခြမ်းသားတွေကို စက္ကူနဲ့ ကော်ကို သုံးပြီ ပြန်ဆက်ပါတယ်။ အရိပ်ထဲမှာ ကော်ခြောက်မှ နေပြန်ထုတ်လှမ်းရပါတယ်။ မဟုတ်ရင် စက္ကူသား ရှုံ့တွသွားမှာမို့ပါ။ ပြန်ဆက်ပြီးတဲ့ ပုံကြမ်းကို အတွင်းက ၅ ထပ် အပြင်က ၅ ထပ် စက္ကူထပ်ကပ်ပါတယ်။ အဲသည်လောက် နည်းတဲ့ စက္ကူထုကိုပဲ သုံးလို့

ဆရာတွေကများ သည် ပို့စ်ကို ဖတ်မိတဲ့အခါ ကျွန်တော့်ကို ဆူဦးမလား လို့ ရေးရင်းတွေးမိပါသေးတယ်။ အခု ကျွန်တော် စုစုပေါင်း ၂၅ လွှာ ပဲ သုံးပါတယ်။

ပြီးတဲ့အခါမှာတော့ ကြမ်းနေတဲ့ မညီညာတဲ့ မျက်နှာပြင်တွေကို ကော်ပတ်နဲ့ စားပြီး အချော သတ်ပါတယ်။ ရေခံ ခံဆေး သုတ်ပါတယ်။

ပြီးတော့ သရိုးမံပြီး လိုအပ်မယ့် စိန်တောင်၊ ကနုတ် တွေ တပ်ဆင်ပါတယ်။ ကျောက်တွေ ဖြည့်ပါတယ်။

နောက်တဆင့်က ရွှေချပြီး၊ ရွှေနဲ့ဖုံးသွားတဲ့ ကျောက်တွေကို ရွှေတွေခြစ်ထုတ်ပြီး ပြန်ဖော်ရတဲ့ အဆင့်ပါ။ ပြည်တွင်းမှာကတော့ ကဖို့အတွက် ရွှေဆိုင်းတွေချတာဆိုတော့ ကုန်ကြမ်းတန်ဖိုးက သည်နေရာမှာ အမြင့်ဆုံးပါ။ (ကျွန်တော်ကတော့ လွယ်ကူသက်သာတဲ့ နည်းလမ်းကိုပဲ ခေတ်မီမီ သုံးလိုက်ပါတယ်။)

လက္ခဏ(၂၀၀၇)

သည်မှာတင် ပြုလုပ်တဲ့အဆင့်က ပြီးပါပြီ။ ရာမာယဏအသင်းမှာတော့ ကန်တော့ပွဲတွေ ဘာတွေ စတဲ့ Process တွေ ကျန်သေးတယ်လေ ... ။

သည် ဘီလူးခေါင်းက မဲဆောက်က ကျော်လင်း ရဲ့သားဆီမှာ (၂၀၀၇)
ကိုသံခဲ ဆီမှာလည်း ဆင်တူ တစ်ခေါင်း (၂၀၀၇)
 

သည် ဟနုမာန် ခေါင်းက(၂၀၀၇) လည်း မဲဆောက်က ကိုလွမ်းဏီသား အောင်ကျော်ဆီမှာ 
(အခုတော့ တခြားတယောက်ဆီ လက်ပြောင်းသွား)(၂၀၁၈)
 

သည်ဒဿဂီရိ ခေါင်း က ကြယ်သီးရဲ့ အော်ဒါ

သည် အတတ်ပညာဟာ အသုံးနည်းတဲ့၊ လူသိနည်းတဲ့အတတ်ပညာတခု ဆိုရင်တော့ မမှားပါဘူး။ ဒါပေမယ့် ကျွန်တော်တို့ငယ်ငယ်တုန်းကတော့ သည်လက်မှုပညာနဲ့လုပ်ထားတဲ့ ကစားစရာအရုပ်တွေကို ဘုရားစောင်းတန်း၊ ဘုရားပွဲ စတဲ့နေရာတွေမှာ တွေ့ကြရပါတယ်။ ရှေးမြန်မာ စစ်ခမောက်၊ ဇီးကွက်ရုပ်၊ နွားရုပ်၊ ကျားရုပ် စတဲ့ စက္ကူကစားစရာတွေဟာ သည် လက်မှုပညာနဲ့ ထုတ်လုပ်တာပါ။ သူတို့ကျတော့ ဈေးသက်သာတဲ့ စက္ကူတွေနဲ့ သုံးကြပါတယ်။

သည်ဒဿဂီရိခေါင်းက အောင်ကျော်ဇာနည် ဆီ ရောက်သွား (၂၀၁၄)

 

ဆရာကိုစိန်ဝင်းက ပုဇွန်တောင်မှာရှိနေတုန်းပဲ တဲ့ ..

ဒါက တူတော်မောင် ပူစာလို့ (၂၀၁၅) ..

သမီးအတွက်လည်း လုပ်ပေးရသေးတယ် ..
ဒါပေမယ့် ... သားအတွက် အသုံးဝင်သွားရော (၂၀၁၅)..

 

 ၂၀၁၈ လုပ် ဒဿဂီရီခေါင်း

(၂၀၁၀ မှာ ကိုပြုံးမှာလို့ လုပ်ပေးခဲ့တဲ့ ဘိုးတော်၊ ရာမ၊ လက္ခဏ၊ ဒဿဂီရိ တစ်စုံစာ ပုံတွေ ပျောက်သွားတဲ့ ကင်မရာထဲပါသွားတာကိုပါ ပြန်တွေးမိပြီး နှမြောနေမိသေးတော့ .. )

အိုးဘို နန်းတွင်းရာမာဏ အသင်းက သင်၊ မြင်၊ ကြား ဆရာအားလုံးကို သည်စာနဲ့ ဂါရဝ ပြုလိုက်ပါတယ်။